Darin: Wir Gerhart van Gotz gnaden herzouge to Guyige, to dem Berge etc. ind greve to Ravensberge, ind Sophia van Sassen, van derselven gnaden herzouginne ind grevinne der vurgescreven lande, syne elige huysfrauwe ind gemahell doin kunt also, as unse lieve getruwen burgermeister ind rait unser Nuwerstat Bilvelde sich to deser tyt van unsar sunderlicher bede ind begerden wegen mit ind gelych uns as rechte principail hoiftsachwalder to henden uns lieven getruwen Johan Nagels, Ludekens seligen son, verschreven, versegelt ind verbunden haint as vur zweydusenthundertindzwenzich overlentsche rynsche gulden to bezalen up sent Thomas des hilligen aposteln dach in den jaren, as man na der geburt Christi uns Hern schryven wirdet duysentveirhundertdryundsevenzich, inhalt des briefs davan sprechende etc., so bekennen wir herzouge ind herzouginne etc. vurscreven, dat uns sulge vurscreven schult is antreffende ind burgermeister ind rait unser Nuwerstat Bilvelde vurscreven mit, geloeven daromb by unser furstlichen truwen ind eren vur nus, unse erven ind nakomlinge de vurscreven burgermeister ind rait unser Nuwerstat Bilvelde und yre nakomen van alsulger verschryvongen, versegelongen und verbyndongen vur uns to henden Johan Nagels geschiet, as vurscreven ist, genzlich to entheven, davan to ledigen, to quyten ind schadeloiss to halden van allen ind igligen schaden, sy deshalven in eyncher wyss hedden, deden, leden, gewunnen of up sy gedain wurde, we sulch schade ouch toqueme aen eynche indracht, hyndernisse of wederrede ind sunder all argelist. Dis to Urkunde der wairheit ind vaster stedicheit hain wir unser beyder segele vur uns, unse erven ind nakomlinge an desen brieff doin hangen. Gegeven to Randenreide in den jaren uns Hern duysentveirhundertzweyundsevenzich up den neisten sondach na sent Martyns dage des hilligen bisschofs.
Enthält: in den jaren uns Hern duysent veirhundert zwey und sevenzich up den neisten sondach na sent Martynsdage des hilligen bisschofs
CC0 1.0 Universal