Darin: Transkription von Armin Scholz-Behlau – Stand 24. Februar 2021
Enthält: Inhalt: Ich Cord Lappe van Koning do kunt ind bokenne appenbar in dussem breve vur mich ind alle myne rechten erven, anerven un nakomelinge, dat ich Hunolt Greven und [Johan __________]1 to Werle, iren rechten erven und heldere dusses breves mit iren willen vur eyne summen geldes, dey my all wall botalt unde yn myne nut gekommen is, vorkoift [hebbe eine]s steden, vasten, ewigen ervekoipes, mit willen des edelen juncheren Clauwes greven to Teckenborch, mynes gnedigen juncheren, de groiten heuwesse mit den wyden hor[___mit] allen iren rechten tobehorungen, gelegen tuschen dem huese to Konenck unnd Henneken Wreden wesse, de van dem vurg. mynen gnedigen juncheren tho leyne geht, so dat se ind me erven de nu vortmer restlichen und ruwelichen, erfflichen, ewelichen unde ummermer heben, bruken, behoiden und scheren sullen ind moisten, sunder myne und myner erven, eder doch anders ymandes yrhande insage off wedderweringe eynges rechten, geistlix eder wertlix. Ind ich vorkoiper vurgeschriven sy vort dusser vurbe- nompte wesse mit all erer tobehoringe vur mich ind myne erven, anerven und nakomelingen uit gegaen, und heben dar upp vortegen mit hande ind munde als recht is, unnd hebben de willichliche gelaten ind overgeven uit mynen handen macht ind weren in hande macht un erffliche brukende were der vurg. Hunoldes und Johans un iren erven und heldere dusses breves, mit iren willen nummermer dar upp to sakene noich antospreckende mit neynerlege rechten, gesitlichen eder wertlichen, ich selves offte myne erven noich nemant anders van unser wegen. Dess hebben ich dach de gnade bohalden vur mych ind myne erven, dat wy dusse vurg. wesse wedderkoipen mogen alle jar upp sunte Martins dach in dem winter offte aichte dage dar na, vur hundert ind dertich overlendesche rynsche guldene, und ich unde myne erven en dey to Werle enbynnen leveren ind betalen sullen to allen iren genoichten und willen, unde den wedderkoipp mach unser eyn dem anderen eyn halff jar to vorne sagen. Und ich Cord verkoiper vurg., have enne dusse wesse vurg. un koipes vur my ind myne erven, anerven und nakomelingen allewege rechte warschoff to doende, alle ansprake, besperinge, indracht hinder ind krait vor ydermanne upp allen steden un vur allen gerichten sunder allen yren schaden afftoleggen unvortaget, so vaken en des noit ind behoiff is, un off den erg. Hunolde und Johanne, yren rechten erve offt heldere dusses breves mit yren willen bynnen kort eder overlanck eynyge bosperinge, indracht offte hinder an der vurg. wesse und erfflichen vorkoipen und koipe geschege eder gehe- daen worde, wu ind in wat maten und so vaken as dat geschege, so bokenne ich Wichard van Ense genant Snydewint, nu tor tyt amptman to Werle, in und overmittz dussem selven breve vur my ind alle myne erven, dat ich alle dusse vurg. artikele und punte eyn recht sakewalde und warburge geworden byn ind sy, und ich lave mit den ergenanten Corde, und he wedderumb mit my, alse rechte gelike sakewalden ind unser eyn itlich bisunder vur all den ergenanten Hunolde und Johanne, eren erven ind heldere dusses breves mit iren willen der vurg. wesse, wyden, hoeden und koipes alle tyt rechte warschoff to doende ind alle ansprake, bospringe und indracht unvortaget to allen tyden so vaken en des noit worde, sunder all eren schaden aff tostellende, dat se des sunder allen schaden blyven sullen sunder argelist. Und off wy sakewalden offte unse erven vurg. desses also nicht endeden naich en also vulle mogen, in maten vurgerort is, wanner wy dan wy dan van den vurgenanten Hunolde ind Johanne, eren erven offte heldere dusses breves mit iren willen gemant worden mit iren baden offt breven in unse jegewordicheit offte woninge, so solle wy ind welt van stuntan na der maninge to Werle in de staet rhiden in eyne gemeyne herberge in leistinge, unser eyn upp den anderen nicht to wachtene, mallich mit eynen knechte ind twen reysigen perden dar stelich leisten und halden, ind neynerleye wyss ute den vurg. stat und leystynge to schedene, wu enhebben enne der vurg. wesse warschopp gedaein, alle anspracke, bosporinge ind indracht affgestalt un alle iren schadne gerichtet to iren willen ind genoigten allet in maten vurgerort. Alle dusse vurg. artikele ind punte lave wy Wichart ind Kort sakewalden vurg., vur unss ind alle unse rechten erven deme erg. Hunolde und Johanne und iren rechten erven ind heldere dusses breves mit iren willen in guden truwen, ind hebt dat na mit unsen lifflichen vingeren rechter gestavedes eede over de hiligen geswarn wair, stede vast ind unverbrocken to haledene sunder alle argelist, ind hebt dess vort to getuge der warheit unser beider ingesegel vur unss ind alle unse erven neden an dussen breiff gehangen. Ind ich Valmar van Walterinckhusen, richter myns gnedigen heren hern van Colne to Werle, hebbe umb bede willen beider vurg. parthie van gerichtes wegen dussen breiff mede bosegelt. Dair over ind ane weren Wichmann Belhaese ind Diderich van Ole, burger to Werle. Datum anno domini millesimo quadringentesimo septuagesimo, fferia sexte post assumptionis beate marie virginis. Rückseite: Signatur Ausf., Pergament, mnd., mit Plica, zwei Pressel noch anhängend ohne Siegel 1vielleicht: borger tho Werl
