Record

100,001/Urkunden, 0084

1497 April 17/BUB 1203
Registratursignatur: Bielefelder Urkundenbuch, S. 671-674, Nr. 1203

100,001/Urkunden 100,1/Urkunden

100,1/Urkunden

1497 April 17 (Up der Walstede)

Darin: Ik Herman Westfall, eyn gesworen lichter unde gogreve des irluchtigen, hochgeboren fursten unde heren, heren, Wylhelms to Gulche unde vom Berge hartogen, greven to Ravensberge, heren to Hensberge unde Lewenberge etc., myns gnedigen leven heren, an der Nygenstat to Bilvelde do kunt, bekenne in unde vormydest dussem breve betugende vor alsweme, dat vor my in eyn openbar geheget gogerichte, dat dar sunderlinx myt ordelen unde myt rechte unde myt dinkplichten dusses gerichtes hyrto geheget unde geholden wart, gekomen synt de erbaren unde vorsichtigen borgermesters unde rait up der Nygenstat to Bilvelde, vortalden unde sechten, dat ze den meyger van Eygeldorpp unde den meyger van Syker unde de ganssen bur to Syker hedden eitert unde laden latenunder de Syker Lynden up mandach neyst na sunte Agneten [Jan. 23] to rechte tyd dages dar to synde, unde dat wer gescheyn mit weten unde vulborde Gerharde Kockes, nu tor tyd rentemester tom Sparenberge. Hyrumme en wer warftich to wetten worden, dat de meygers unde de bur to Syker wolden van eyn deylen dat Sykerbrock, unde dat wer ore unde orer gemeynborgers gemeyne ghorweyde, unde hebben myt den van Syker in demselven broke ere hoyde unde noythouwen unde des wolden se myt fromen luden eyne tuchnisse foren, dat ore voriaren tovoren unde se na ensolk in besitte unde in weren gehat unde noch hebben, wysten de meygers unde de bur to Syker vorgenompt edder jemant van orer wegen de tuchnisse myt rechte weder to leggende edder myt rechte wes in to seggen hedde, dat se dan up den vorbenompten mandach to rechte tyt dages dar tor stede weren. Unde des dages hedden se in maten vorgescreven also gewardet, do were dar de erbaren Lubbert de Wendt, Otten seliger sone, unde Joest van Varendorpp myt itliken knechten ut dem ampte tho Barckhusen gekomen, als dat gerichte gespannen was, unde hadden gesecht, de dach were en unwitlick unde wolden dar nicht to vorstaen, de tughe to vorhoren, edder de dinge to beseynde unde to vorclarende. Also were de dach unfruchtbar gebleven, dan dar wer dorch Lubberde unde Joeste den meyger den buren to Syker vorgenompt eyn stevelik echt plichtdach bestimmet unde angenommen to holden, dar wy borgermester unde rait in vulborden unde deden des myt Lubberde, Joeste, den meygers unde buren vorgescreven, eynen ingank, welker dach scholde syn up derWalstede des derden mandages na Paschen [17. Apr.], unde den scholde men dar holden unde vortfaren in aller mate to holden, als des mandages na sunte Angneten. So bekenne ik richter unde gogreve vorgenompt, dat de vorbenompten borgermesters unde rait up den derden mandach na Paschen vor my jegenwordich up de Walstede quemen unde begerden van my gerichtes unde leten seggen dorch eren vorspraken, se weren dar unde wardeden des echten steveliken plichtdages, als de dorch Lubberde, Joeste, den meygers unde den buren to Syker, wer angenomen unde bestemmet unde wolden deme dage volgen unde deme avescheyde genoch doen. So hedden dar deghenen, dar se de tuch nisse in maten vorberort mede foren wolden unde leten van my, riehter unde gogreven, myt rechte eyschen, dat ik in dussem sulven gerichte wolde bekummeren unde besetten den olden Johan Beckere, Bernde Klensmede, Abeken Becker, Cort Ordinghe, Bernde "Wlomen, Hencken Paspenbrock, Johan Asschoff unde Hinricke Budden, dat de vorbenompten dorch God unde umme des rechten wyllen de warheyt seggen wolden, wat en witlik unde kundich were van dem Sykerebroke, wanten se do den vorbenompten borgermesters unde rade dorch rechtesdwangk nyner antworde weygeren konden, bereden sick de vorbenompten unde quemen weder in gerichte, bekanden unde seden alle semptlich unde eyn juwelick besunder. In dat erste de olde Johan Beckere vortalde unde sede, eme were witlick unde kundich, unde he hedde in syner joghet seligen Aleff Kregell gehot syne koyge yme Sykerbroke unde were darna syn knecht geworden unde hebbe darinne gehouwen tunholt unde erwetroden unde hebbe de dar utgeholt ungehyndert, unbespert van jemanden, unde nu anders to den tyden syet der tydt gehort, dan dat ed sy der van Bilvelde unde der Sykerschen gemeyne gorweyde, des lenk sy dan seventich jare. Ok bekande unde sede Bernt Kiensmet, dat he hedde gehot synen seligen vader unde eme darinne gehouwen tunholt unde erwetrode, dat eme nu dar indracht gescheyn sy, were an hode an houwende, unde en hebbe nu anders gehort, den dat ed sy gemeyne gorweyde der van Bilvelde unde Sykere, des sy boven de achtentich jare. Vortmer bekande unde sede Abeke Beckere, dat eme kundich unde witlik were, dat he by tyden synes seligen vaders darinne hedde gehot unde gehouwen, dat eme nu bespert were van jemande, unde by synes seligen vaders tyden hedde dar eyn vaget gewest, geheten Henne yme Hove. Do hadden de van Bilvelde darinne gehouwen, dat hadden de Sykerschen in eren wech gefort myt forsse. Do hadde de vorgenompte vogt unde de van Bilvelde dar weder in dat brok gegan unde hedden dar weder inne houwen, dat de Sykerschen hadden to broke sulves do foren most in den gemeynen helwech by den Sykerthoren. Ok hadde he darut gefort tunholt seligen Ludeken van Grest, dar dat Rusfelt to der tyt mede were van ander tunt, dat eme nu bespert were; des sy lenk dan dertich jare. Ok bekande unde sede Cort Ordinck, dat he hedde gehot unde gehouwen yme Sykerebroke, dat eme nu bespert were; des sy lenk dan sestich jare. Bernt Wlomen wer ok witlick unde kundich unde hadde gedenet Bernt Mencken to Sykere deme olden unde hadde darinne gehot unde gehouwen, dat en were eme nu geweygert. Ok hadde he gehort van Hartwich Meybome, to der tyt voget der Wende, dat dat Sykerbrock were gemeyne gorweyde der van Bilvelde unde Sykere; des sy boven de vyftich jar. Ok bekande Hencke Papenbrock darsulves, dat he hedde gehot dat Hatlagerholt up wenten up de Ciahorst unde vort dat Sykerbrock up wenten boven up de Egge, dat eme nu hode geweygert were van jemande; des sy lenck boven de sessundevyfftich jar, dat he der van Bilvelde koye hode. Ok bekande Johann Asschoff, dat he syne erwetrode unde tunholt darut gehouwen hedde, dat eme nu bespert en were, hadde ok nu anders gehort van synen elderen, dat dat ed sy gemeyne gorweyde der van Bilvelde unde Syker; des sy vorgangen boven de vyftich iar. Ok ys gekomen Hinrick Budde, bekande, dat he unbespert hadde gehouwen unde gehot, des lenk sy dan vyftich iar. Als dusse vorbenompten tuchbar frome mans dyt alle, wo vorgescreven, by eren waren worden tovoren vortalt unde gesecht hadden, sworen se dat na myt eren upgerichteden lyfliken vyngeren rechter gestaveder ede to Gode unde den hilligen, dat se anders nicht en wysten, nu gehort unde en ok nicht anders kundich noch witlick en were, dan dat Sykerbrock sy der van Bilvelde unde Syker gemeyne ghorweyde. Ok wart dar gefraget umme eyn ordel, dat recht were na deme male, dat dar were de stede als up der lemenkulen by Syker, were eyn echt plichtdach dorch Lubberde unde Joste unde den van Syker bestemmet unde angenommen, unde den dach hedden se utgeslagen unde nicht geholden, oft dar ok eyn hoger gerichte mochte boven gelacht werden, dat gericht darmede to krenken. Darup wart gewiset vor recht, neyn, dar en mochte nyn gericht boven ghan. Dinkplichten dusses gerichts, de dat mede bestonden, segen unde horden, synt da de ersam heren Kodiger Kole vame Steyne, vogede tome Sparenberge, Halewattome Steynhusse, Johan Kock, borchgreve etc., Albert Klossenmaker unde mer ander vromer lude genoch. In eyn orkunde unde tuchnisse der warheyt aller vorgenompten puncte, de so vor my Herman, richter unde gogreven, vorhandelt unde gescheyn synt, hebbe ik myn ingesegel witliken an dussen bref gehangen. Datum anno Domini dusent verhundert sevenundenegentich ame mandage na dem sundage Jubilate.

Enthält: anno Domini dusentverhundert seven unde negentich ame mandage na dem sundage Jubilate

niederdeutsch

Archivale

Sortierdatum: 1497-04-17

Archive in NRW

CC0 1.0 Universal

Object in the 'Deutsche Digitale Bibliothek'

05.11.2025, 3:56 PM CET