Herzog Heinrich von Braunschweig-Lüneburg erneuert für sich und seine Brüder das von seinem Vater mit Graf Johann von Oldenburg abgeschlossene Bündnis. Beide Teile verbürgen sich den Besitz des gemeinschaftlich eroberten Stad- und Batjadingerlandes und versprechen sich gegen jeden Feind Beistand. Von Gotsgnaden wy Hinrick de Junger, hertoge tho Brunszwig und Luneborg, ock von wegen der hoichgebornen iursten hern Wilhelms und hern Ericks, unser leven broder, und wy Johann greve tho Oldenborg und Delmenhorst, bekennen vor uns, unser aller erven und erffnehemen in dussem open breve. So alsze sik wielandt de hoichgeborne furste her Hinrick de Eider hertoge tho Brunszwig und Luneborg etc. unsze leve here vader, gnedige her und oheme loveliker gedechtnissze, mit uns graffen Johanne vorgnant, up de lande Buthjadingk und Staithlandt, als de dem stiffte tho Bremen enthwant gewest, und sust in vergangen tyden erffliken thosammende gesät, vereynigt und verdragen hefft, na inholde eyner vorschrivinge uns dar over gegeven, desulven vorschrivinge wy hertoge Hinrick obgnat hirmede gewilligt und in neynem punckte gekrengket willen hebben, dat wy uns demna und angesehen den fruntliken willen, als wy underlang gehaith und nach hebben Godde dem almechtigen tho love, pawestliker hillicheit, dem hillichen Romischen rike und der erffvordracht, so wy hertoge Hinrick mit den hoichgebornen fursten hern Hinricke zeligen hertogen Otten söhne und herrn Ericke hertogen tho Brunszwig und Luneborg etc. unsen leven veddern hebben, und szunderlick ethliker verwentnisse, de uns graffen Johanne dar tho bewegen, obgedachten hertogen Hinricke zeligen hertogen Otten sone unvorfenglick na afsterven gedachten unses leven hern vaders gnedigen hern und ohemen, wy hertoge Hinrick obgnant alsze regerender furste ock von wegen hoichgedachter unser leven broder und wy graff Johann vor uns und unser aller erven uns mit unsen landen und luden erffliken thosammende gesät, voreynigt und vordragen hebben, und doin dat jegenwerdich in und mit crafft dusses breves alszo, dat unser eyner by dem andern jegen eynen jdern in sinen anliggenden noden, wu he over rechtserbeidinge beweldigt, overtogen edder beschedigt worde, mit densulven unsen landen und luden by einander blyven willen, unser eyn den andern na alle sinem vermögen mit hulpe, raide und biestande, nicht toverlatende, sundern de vordracht alsze unse leve her vader gnedige here und oheme mit uns graffen Johanne gemaket, willen wy hertoge Hinrick mit allen eren puncten und artigkeln fullenkomeliken verfolgen und holden, der geliken wy graff Johann edder unser erven, soviell die uns verstrigt, ock doin willen und schullen ungeverlick. Weret ock, dat wy greve Johann edder unse erven umb Staitlandt, dat wy mit der hulpe Goddes, unses gnedigen hern und ohemen zeligen hertogen Hinricks des Eidern, anderer unser hern und frunde mit groten kostungen erlanget und wedderumb tho uns gebracht, als uns dat durch unsen gnedigen hern und ohemen zeligen, wu verne sick dat sulve Staitlandt erstreckt, mit allen kaspellen, eren gerechticheiden und thobehoringen nichts darvon uthbescheiden in der vorschrivinge uthgedrugt verschreven, angelangt edder beszwert worden, dessulven halven schullen und willen wy hertoge Hinrick unse broder obgnant edder unse erven na vermöge sollicker verschrivinge by greven Johanne tho Oldenborg und Delmenhorst edder sinen erven blyven, ohne mit unsen landen, luden hulpe und raide alle unses verv mugendes nicht toverlatende, sundern wy willen de gegeven vorschrivinge unses leven hern vaders zeligen, alsze sine leve wolde gedain hebben, verfolgen, alszo dat
