Graf Johann V. von Oldenburg und Delmenhorst stattet den Altar der heiligen Anna im Schloss zu Oldenburg und die neue von ihm gebaute Kapelle der Heiligen Fünf Wunden auf dem äußeren Damm mit einem Lehen (bzw. Präbende) für den Geistlichen, der beide verwaltet, aus. In deme namen des hern, amen. Wi Johan greve to Oldenborch unde Delmenhorst bekennen apenbar in dusseme breve vor alszweme, wi gade Almechtighen to lave unde uns to heyle hebben vorlathen recht unde redelich gevende, laten unde ghevene in crafft dusses breves to ener ewighen blivende gave by den tiden wi des vullenkamen macht hebben to donde vor uns unde unse erfnamen to twen altaeren unde lenen, der een in de ere sunte Annen geconsecreret is up unseme slathe Oldenborch, dat ander an ener nigen Capellen dorch uns ghebuwet in de ere der hillighen viff Wunden buthen uppeme Damme vor unser stad Oldenborch beleghen, eyn halff verndellandes uns erffliken rechtes tobehorich, liggene in deme Moerrime thome Slorenbuttel tuschen der wedeme to Huntorpe unde Johanne van Olden, dat nu to meyer rechte bruket ener Bernd Henneken mit alle syner tobehoringhe, more buwlande unde weyde wenth up de Hunte, so uns dat sulfste jarliker hefft ghegeven unde innerenthet, genslich sunder den denst by den twen lenen vorbenompt to blivende. Ock veer und twintich rinsche gülden, de wi nu in Gherdes van Schagen verndellandes to Elsflethe mit jarliker renthe vorsegelt hebben, by den sulfsten lenen ewich to blivende. Were sake sodane veer unde twintich gülden wurden van vormelten Gherde offt synen erven na tiden uthgheloset, schallen unde willen wy unde unse nakomelinghe de fordt uppe andere bequeme wisse stede to der sulfsten renthe wedder beieggen. Dar tho willen wi unde unse nakomelinghe deme prestere, dem de beiden vorghedachten lene van uns unvorschedelich vorlenth wurden, stedes up unseme slothe gheven de vryenkost, dewile he de beyden lene nach dusser nafolgende vorbindinghe wäret unde inne hefft, so dat de prester ergenant redelich an eyner jeweliken weken to dren ewighen missen schal vorbunden syn to den vilbenompten beyden lenen beschedeliken, des mandages ene misse up der Borch to gnaden allen christenen seien, des dinstedages ene misse uppe der Borch to lave der hillighen frowen sunte Annen unde des vrydages ene misse in der Capellen uppe deme Damme to eren den hillighen viff Wunden to holdene offt holden lathen. Alle dusse vorgescrevenen articule stedes unvorbraken to holdene unde blivene sunder alle hinder, krimende, gheverde unde argelist, orkunde des unde tuchnisse der warheyt aller vorgherorden hebben wi Johan greve obgenant unse ingesegel benedden dussen bref dan hanghen. 1501 März 23 (Ghegeven anno domini millesimo quingentesimo primo des dinstedages na Letare Hierusalem)
