Die Brüder Wael, Albert, Hinrich und Hilwert Baren geben dem Hinrich Wittensande als Mitgift für ihre Schwester Grete ihr zu Krögerdorf (to deme Kroge) im Stedingerland belegenes Gut, das zur Zeit von Erp Baller bewirtschaftet wird. Ausfertigung Pergament, 24 x 11.5 cm, beschädigt. - Rep. 3 Lilienthal, Nr. 474. -4 Siegel angehängt, fehlen. Wy Wael, Albert, Henrick a unde Hilwert, brodere geheten Baren, bekennen unde betugen openbare vor/ alsweme in dessem breve, dat wij myt wolberadenen mode unde na rade al unsser vrunt hebben gelovet/ unde gegeven, loven unde geven na cristliker ee deme duchtigen Hinrike Wittensande, Greten, unsse leven/ suster, to eyner echten eeliken husfrowen unde hebbet eme mede to brutschatte gegeven, loven unde geven em/ mede, so vorscreven is, iegenwardigen in crafft desses breves unsse gud belegen to deme Kroge am Stedinglande/ by der Berner zijd, dat nu to tijden telet unde buwet Erp Balleer. Unde wij unde unsse erven schullen/ unde willen on unde eren erven des vorscrevenen gudes vor vrig ervegud, uthgesproken den tegeden unde/ anders nicht, rechte warende wesen vor alle rechte ansprake, wanne, wor unde wo vaken eon des nod offte/ behoff werdet. Alle desse vorscrevenen articule unde stucke stede vast unde unvorbroken wol to holden loven wij/ brodere alle vorbenant vor uns unde unsse erven Hinrike vorscreven unde zinen erven in guden truwen sunder/ argelist. Unde hebbet des to mererer bekantnisse unde tuchnisse unsse rechten ingesegele alle witliken gehangen/ heten an dessem breff, de gegeven unde gescreven is na godes gebord dusent verhundert dar na am viff unde/ vertigesten iare, des negesten sondages na deme hilgen dage unsser leven frouwen Visitationis. a Vorlage hat Hebnrick oder Hehnrick, wobei der dritte Buchstabe verschrieben erscheint.
