Graf Johann V., Graf zu Oldenburg und Delmenhorst schlichtet eine Zwietracht zwischen dem Kapitel des Lambertistifts zu Oldenburg und dem Meier Berthold Stümer der St. Annen-Pröve (Vgl. Urk. Nr. 280 von 1501 März 23). Die Urkunde über die 1514 genannte Pröve scheint verloren gegangen zu sein. Wy Johan greve tho Oldenborg unde Delmenhorst don kunth unde bekennen apenbare in desseme breve vor alsweme. So als itlike twidracht irstanden unde eyne tytlang gewest is tuschen den andechtigen Unsen leven besunderen capitel to Oldenborg unde den meyer tho sunte Annen proven, nu thor tydt Bartolt Stumer, umme den tegeden, dede der sulfsten proven thobehort na lüde der fundacien unde doch mennich jar by deme gude gebleven is, hebben erbenompt capitel darumme gefordert unde derhalven de meyer vorberort sick dorch dedinge syner frunde Clawes Slore, Hinrik Slore unde Johan Baken daranne vordragen unde mit willen ingegan, also dat he unde syne nakomelinge willen unde schullen den tegeden van allen buwlande, so sunte Annen tobehort, vryg unde umbekummert then laten unde foren, so den jennen, de proven hefft, belevet mede tho donde unde latende, wo wi unde andere erffexen mit unsen tegeden don, sunder jenige besperinge. Dar tho schall de meyer jarlikes synen afftegeden geven, ock den wittendach unde hoffdenst dar van entrichten, unde mit der garven schal de meyer sick holden geliick unsen edder guden mannen meyeren to dingende edder tho dorschenne. Ock als erbenompte Bartolt nu uppet nye eyn hus up de buwte geseth hefft, dat schal he nicht beter maken den als eyn gemene lantman eyn gewontlich buwhus na rechte uppe ene buwe setten mach, unde als he dat groter edder beter buwede, dat schall der proven erbenompt unschedelich wesen, unde als de lanther und de meyer sick nicht vorliken konden, so mach de meyer, so he hoger gebuwet hadde als vorgerort, dar wedder affbreken unde in syne nuth keren. Na deme alle vorgerorde articule alzo bewillet unde gesehen syn, hebben wii tho merer orkunde unse ingesegele an dessen breff heten hangen [..., folgt Datierung] 1514 Juli 17 (Ame dage Allexii anno domini millesimo quingentesimo decimo quarto)
